好孕到！懷孕初體驗

Positive 好孕到 ！懷孕週數係以上一次經期嘅第一日計，所以當你知道懷孕時其實已經係1個月咖啦！

經期準嘅話可以係下次經期前5日左右已經驗到，通常會用大衛牌驗孕試紙（綠D），平靚正之餘亦可以睇到有冇加深！（可以隔日驗，如果冇加深就要快快去睇醫生啦！）

【小知識分享】驗孕試紙係透過檢測尿液中嘅HCG（人類絨毛膜促性腺激素）嚟判斷有冇懷孕，係懷孕先有嘅分泌，而且會愈嚟愈濃。綠D比起驗孕棒係比較唔敏感，但好處就係佢咁唔敏感都驗到你有&有加深咁就放心啦！如果到咗經期日驗都係好淺色&之後幾日加深都唔明顯，就有機會係化學懷孕/宮外孕，最好去驗血check下HCG濃度喇！

知道有咗之後返咗幾日工就即刻請咗一星期假係屋企休息，都有keep住睇中醫調理，一次過開6-7日藥減少走動。懷孕初期係食葉酸就ok，我有自己煲桑寄生蛋茶同埋每日食烚蛋，一個星期飲一兩次花膠湯⋯呢啲嘢趁食到個時就食啦，因為突然間會有日你係對呢啲野反胃，望到都唔得⋯⋯我食咗大概兩星期多啲就食唔到喇⋯

係懷孕頭三個月我試過兩次流啡，一次流血（有興趣可以睇【懷孕 – 流啡/血「驚」歷】），平躺對懷孕初期嚟講真係好緊要，唔一定要瞓著覺，瞓係度睇下電視睇下野，家務個啲野就唔好掂了，其實講到底係要休息，因為初期係好攰，個人會無啦啦斷電咁要瞓覺/坐底，始終用咗媽咪好多嘅energy去養大佢，同時個身體都要適應荷爾蒙嘅轉變。（我上一次唔好經歷嘅時候真係照日日返工，吸塵拖地抹嘢個啲家務隔幾日就做，出街市買餸之類⋯）